Tia Delfina di Mindara

Palabra di Kabantada

Nlei é libru di nha ermon Emílio, gustundera fican na boca. Na nha oredja i stan nan suma cimena.

Tia Delfina i di Mindará ma i stan nan suma Maragusta kun kunsi na Bafatá, suma Arminda kun odja na Susana, suma Fantandin kun kunsi na Catió.

Tia Delfina di Mindará mostranu kuma tarbadju cata ngana ninguin. Inda mas tarbadju onestu.

Kin ku fiança na si mon, i ossa mandurga, i ca medi bentu, frio, calur ku tchuba na ora di kebur si bemba ta intchi, fomi ta lundju si morança, si nomi na ba ta sabi na boca di djintis, rispitu ta passal dianti.

Casssamenti i balur di mindjer, ma tambi i ca tudu pós ku padidu pa sedu dus. I tem um pó ku ta sikidu el son ma i ta dá bom sombra. I suma goiaba di lala.

Sintadu as bês i mas familiar, i ta dipindi si bu ca curtu rostu pa djintis.

Djila ta tchiu camarada inda mas djila di kussa di pui na stangu.

Kin ku falau pembidu cata pui na ragas i pabia i ca kunsi nan mindjer ku mbita panu lanciadu na rabada na kau di mandjuandadi.

Su fala mindjer djusta i pabia u ka ianda Guiné, i pabia i cata bai purtu di canua, i pabia u cata mandurga na paragens, i pabia nunca u bai Lumu di Olossatu.

Mindjeris tem, ma mindjeris diferentes. I tem mindjer ossanti, ku cata medi corda onça padida, ma i tem manga di mindjer balenti ku cata mpina nin dianti Rei di Oinkas!

Tia Delfina i um di mindjeris balentis. El ki sé rainha. Tia Delfina padidu na Mindará ma i sardia Guiné mpés. I ka pa bai kndenguê, i ka pa bai bnanghandadi i pa bai topoti pa tici si casa pa pudi cria si kindin kondon. Si Duturna. Si alma. Si udju.

Tia Delfina ka pircisa di gabinete, nin di saltu altu. Si chinelus apaga letras, si chambres, ku si bontadi di pirmi calur pa paka ninguin tchulil dedu na Mindará ntidu, cedu ki mostral caminhu di Purtu di Kanua. La ki si kau di surni. La ki si kau di otcha duchilin ku caneca di arruz. Dia ki otcha, i ta fala Nhor Deus obrigadu. Dia tan ku cathcur mangu unhil fiaf, ntereus puku. Bida i sin. Albez i açúcar, albez i fel. Mindjer tarbadjadur nunca i pursumi kil ku dia dal. I sim.

Tia Delfina, suma manga di mindjeris di nô terra, fiança na si pô di buli. Kriasson di si mame ku si dona ka nganal. Su pui djuiz na fugon bu cana cansa. Fomi cana teneu caba gora u pudi ganha dinheru limpu suma laba di Fula son na cusinha.

Té pa bata iari iari na porta di djintis, té pa bata torkia mom ku omis, mbés di seta kil combessa di: “Totis na cama, nha dinheru na bu mon”, té pa seta lebsimenti di soronhas, té pa seta ragassadu ba suruas ku naris, Tia Delfina decidi nan fassi si klandô na si baranda...